Dalha ang lasang sa imong nataran

Dalha ang lasang sa imong nataran

Ni Elaine Grace Lape

May mga higayon bang buot mong sum-okon-suroy ang lasang dihadiha apan ang pag-isip niining malayo maoy labing taas nga bungtod-kakulian sa gusto mong buhaton? Paslaga ang pagduhaduha nga naghugpong diha sa imong hunahuna. Alang sa imong kasayon, dalha ang lasang sa imong nataran! Dili kini usa ka hanap nga posibilidad ni makabughat nga buhat busa ayaw igatungina sa imong kaugalingon. Mahimo mong kabalhinan ang bisan gamayng tugkaran ug mahimong mopahigayon niini bisan ang mga kamot nga malinghod.

Ang mga matang sa dakit nahilakip sa masayon pangitaon sa atong dapit. Kalagmitang hisigpatang magdinaganay dulhog sa mga tampi sa suba o pangpang haduol sa lapyahan, kining matanga sa kahoy o bagon maoy usa sa madali o kinaham bonsayon. Alang nako ang bonsai, mokompleto sa konsepto sa usa ka wild garden o usa ka lasang.

Maanindot sud-ongon ang bonsai nga diha gipatubo sa bato ug mahimo usab kining ibalhin-balhin, ihatag o igasa.

Kon ang imong natad halapad ug may pipila ka punoan na sa kahoy, mahimo mo pa gihapon kining tulbok-tulbokan sa hilabihan kadaghang bonsay. Ang ibubungan o daghang andana sa kadahonan, nagtanyag og hataas nga matang sa makapahimudlay nga kalunhawan sa mga mata ug pamatyag.

Kon magmalamposon ka sa unang lakang, mahimo mo nang pat-ak-pat-akan og lain-laing mga bulok o tanom ang imong dwarf forest, hiwaon sa mga latasanan ug elementong tubig sama nga ang Eden gidagaydayan sa mga suba ug pasanayan og mga mananap nga madagko o magagmay kanang kolonon, kinulit o mugna sa arte. 

Niining  paagiha igo mo lang gipanghulma ang tipik sa katahoman sa kinaiyahan pinasigo sa gidak-on sa imong nataran. Di mo na kinahanglang moadto pa sa layong kakahoyan kay daw nagpuyo ka na sa kiliran o pusod sa lasang.