balak-2

Dihang wa na misaliko ang akong pag-ampo

Ni Elaine Grace Lape

Human sa laing pagbadbad sa mga gapos ug baat,

Tapos sa ikatulong tingkaon,

Giihap ko na sab habwa-balik sa taro sa biskwit-

Mga baraha ug ginisi-gising karton;

Mga basiyo sa pulbos ug losyon;

Mga tansan ug bato sa sungkaan;

Libreta ug mga isperma;

Mga upos sa sigarilyo, bayanan ug palito sa posporo;

Duha ka papel de bangko ug lima ka sensilyo;

Mga tipak sa ngipon ug lugas sa buhok sa selopin sulod sa walay pares nga medyas.

... Tres, kuwatro, singko ug sayes.

Pito ka gatos kapitoan ug unom-

Mga adlaw nga ako napala sa panan-aw sa Adlaw

Apan labaw pa niana ang mga takna sa akong pagpangaliya

Ug ang nangagayng mga luha-

Nga giisip kong mga lugas talamdan sa pagrosaryo matag karon ug unya.

Giipon ko na usab sa tinigom-

Usa ka buhok nga bag-o kong naibot-

Laing ihap dugtong sa gibag-on sa kadulom.

Gipakaingon ko bag nagdupa ako sa paraiso,

Dihang gihanyagan ako og usa ka amahanong pagsagop sa bag-ong hibalag, soltero ug haduol nga kaliwat.

Mitabon ang way sama nga kamapuangoron sa gamayon niyang nawong sa maong higayon

Apan luyo diay a maong panagway, mihuot ang usa ka dakong panuway

Ug gihimo niyang tanaman sa mga tunokon ug panyawan ang akong kalawasan... ang akong kinabuhi.

Nag-awit sa gihapon og mga salmo sa pagdayeg sa Ginoo king galamhan

Sukad pa sa adlaw sa akong pagkailo,

Sa ngadtongadto hipalgan ko

Nga ang matag paghilak maoy usa ka pagtungab sa kopa alang sa temporaryong kahumpay,

Ang pagluhod maoy usa ka pagpabarog sa halaran alang sa mas hugot kong pangalyupo

Ug ang pagpiyong maoy akong pagdagkot ug pagtutok sa lampara sa paglaom.

Nasingohan ko na sab ang kaisog

Sa pinalabi niyang agwa,

Tiniman-an sa napukaw kong kaligutgot

Ang alisbo sa maong pahumot,

Nahibalik ako sa panuigong trese

Dihang napunggak sa nagngangang yuta

Ang akong pagtamod niya.

Mihinol na usab sa gidlay kong buhok

Ang palad sa kasamok,

Sa ngadtongadto milambod sa akong ulo

Ang nagkasubsob niyang mga hapyod

Ug nahimo kining usa ka maugdang ng purong-lukong-

Namuwak og itom.

Gitimbang ko kini

Apn hipalgan ko lang ang nagkapaspas nga pagtay-og sa akong panghinimbang,

Milingiw ko nunot ang papasa sa hinurot kong kapungot

Ngadto sa tuo kong kamot.

Kalit nga milupad ang taas-og-kuko kong tudlo

Tumong sa usa ka bola sa iyang panan-aw.

Midugo ang sulod nako sa nagduwelong kakuba

Gilayon mihawid ako sa nabutaan kong panghinultol.

Kadali ko ra usab nga nalukat ang akong kahiamgo

Dihang kalit nga miuntol ang akong diwa sa salog nga semento.

Nakig-ambas sa pagtubod sa akong mga luha

Ang kapaspas sa akong pagpangaliya

Bisan pa man sa nagkahugot nga paggapos sa akong gininhawa,

Wa ko lugaki ang pagkupot ug pagtayhop sa tugot sa gipatugpo kong pangamuyo
Ug sa hilabihan nga kakalit,
Nabuhian ko ang halawom kaayo nga gininhawa
Dihadiha hikit-an ko ang pagkahagtos sa dakong rosaryohan sa akong panumdoman
Ug nadungog ko ang dinahunog sa mibaha nga mga lobitos ngadto sa ganghaan.
Nabukas ang gakot sa akong pahiyom
Dihang hibatyagan ko ang paggula sa balabag sa mga misteryo sa kasakit
agi sa di ko na matak-om pang baba
Sayod ang Labawng Kagahoman,
Buot ko lamang maangkon ang daghanang tikang sa usa ka bukas nga panaw
Busa, mibangon ako
Ug sa hinanali, gibiyaan ko ang usa ka tinagong lawak...
Oo, lakip ang nagbuy-od kong lawas.
Ug midagan ako sa subangan sa kagawasan!