Pagbonsay diha sa bato

Pagbonsay diha sa bato

Ni Elaine Grace Lape

Ania ang paambit sa labing yano nga pamaagi sa pagbonsay og dakit diha sa bato, pinasikad sa akong nasuwayan lamang:

1. Itakin ang malantip nga sulab sa tinguha nga gipuanan sa kadasig sa imong pagpangita og usa ka punoan kaha gingharian sa mga dakit sa inyong dapit ug pagpanglunggo og mga sanga niini.

2. Sa inyong nataran, busga sa sustansiyadong mga pagkaon sa tanom ang kaang, lata o unsa mang katamnan. Pangangaha ang yutang-tamnan ug patak-oma usab og tarong human mo mausok ang igtatanom o piniling sanga sa dakit o ficus indica. 

.

3. Galma o sangkapi sa nag-unang panginahanglan niini ang imong gitanom ingon man ang yutang gitamnan.

4. Pangaplag og dakong bato nga ambas o labaw sa gidak-on sa imong ulo ug may lungag nang daan sa tunga ug ibabawng bahin lamang. Ihiklin lang una kini sa daplin.

5. Kon sa imong pagtimbang-timbang maugdang ang pagtoong milambo na ang mga gamot sa maong tanom, haw-asa kini sa gitamnan niini kay andam na kini sa pagbalhin. Liboti og mga lanot sa bunot ang mga gamot sa dakit ug ipahimutang dayon sa buho sa bato nga may igong yuta. Buyokig dugang yuta ang punoan sa napahimutang nga tanom ug haklapig dugang bunot nga unlanan usab  sa mga bato nga moabag pagpabarog sa tanom.

6. Ibalhin ang dakong bato nga gitamnan sa dakit sa dapit o nasikohan sa inyong nataran diin ang Adlaw mabawo og pangita niini hangtod nga ang mga gamot sa bonsai magsugod na pagpangupot sa gitamnang bato.

7. Paimna kanunay ang tanom ug pangalasagi nga dili matandog pirme.

8. Disiplinaha unya ang imong bonsay. Patuboa kini kutob sa gusto mong gimub-on ug palipanga agad sa buot mong porma niini. Ang pinul-ong nga mga sanga mahimo mo na usab ipasanay-bonsay