Ako ang putol nga balak
Ni Elaine Grace Lape
Nahukaw ako sa usa ka halayong tawag nga mikayaw sa kagabhion,
Mitakyap na usab sa akong galamhan ang nahablon nga mga garay sa pag-alindasay.
Sa usa ka tampi sa akong handurawan
Atua ang nagtingkawong linalang
Kansang mga kamot tinangkolan
Ug kansang usa ka tiil dili sinapinan,
Nagsaling-ay siya ug bag nga de lana,
Takulahaw mihangad sa pikas nga buwan.
Sa halayo atua ang usa ka kinulasang tulunggon
Nga nakaob sa parasan
Buot kong lugtason ang gapos sa panas-
Ako ang magtitiing nga nangaplag sa usa ka kopa.
Anus-a matapyan ang kitara?
Ako ang berso nga nangapkap og mga nota,
Ako ang undak nga nangandoy sa haom nga sonata,
Ako ang putol nga balak...
Nanakayan sa kapunawan ang pikas nga Buwan,
Mibarog ko ug gidulong ang buhing tubig,
Hikaplagan ko pa unta sa laing mga mata
Ang buot kong makita sa sapa.
Hayan di ko masumada ang kagantongon ug kasangkaron
Sa usa ka hulusayon,
Kaha katunga sa akong gipangita-
Usa ka nagngitongitong tanghaga.
Binilanggo pa sa botelya ang tipik sa akong mga katawa,
Magpabiling hubo ang usa ko ka tiil sa pagbaktas
Apan way puas ang tinguhang
Makasul-ob og bildong tsinelas ang pikas.
Ako ang putol nga balak,
Nangita sa tukmang kadugtongan.
